பேருந்து...

பேருந்து...

நீண்ட நேரம் நீண்ட வரிசையில்
நின்று ஒரு பக்கம் இடுப்பொடிந்த
வண்டி வருகையில் முட்டி மோதி
சட்டை சலவை கசங்க உள்ளே ஏறி...

அங்குல அங்குலமாய் நகர்ந்து
அரை மணி நேரம் போனபின்
மூணு பேர் சீட்டில் நாலாவதாய்
சிடுமூஞ்சியின் அருகமர்ந்து...

நனைந்த சட்டைப்பையில் ரூபாயும்
ஈரமானதோ என எடுத்துப் பார்த்து
பின் பத்திரமாய் உள்ளே வைத்து
காலியாகும் அடுத்த இடம் எதிர் நோக்கி...

மூன்று வரிசை தள்ளிக் காலியான
இடத்தை ஒற்றைத் தாவலில்
எட்டிப் பிடித்து ஜெயித்த சந்தோஷத்தில்
சுற்றும் நோக்கி கால் சற்றே விரித்து

சுகமான கோழித்தூக்கமுடன் பாக்கி
யாத்திரை முடிக்குமுன் ஒரு கர்ப்பவதியோ
இல்லை குடுகுடு கிழவியோ வராதிருக்க
மனசு பிரார்த்திப்பதை தடுக்க இயலவில்லை….

:::நாகராஜன்:::